Sa Agdao parish, buhi ang pagtoo

Sa pagsaulog sa ika-50 nga kapistahan sa San Antonio de Padua Parish sa Agdao, Hunyo 16, dako ang pasalamat nga gihatag ngadto sa Ginoo tungod sulod sa 50 ka tuig, nagpabiling buhi ang pagtoo.

Sumala sa kura paroko, Fr. Leonie España, buhi ang pagtoo sa mga parokyano sukad natukod kini sa mga PME Fathers, ilabi na nga gigasahan ang parokya sa bokasyon sa pagka-pari ug pagka-relihiyoso.

Gisaysay ni Fr. España ang mga pari nga taga-Agdao nga sila si Fr. Proceso Gimeno, Jr., kura paroko sa San Miguel Parish, Panacan, Fr. Ricky Peñalosa, kura paroko sa Holy Family Parish, Baliok, Fr. Mervin Maglana nga anaa sa St. Joseph the Worker Parish sa Sasa, Fr. Hermes Larry Sabud sa Society of Mary ug uban pa.

Matod ni Fr. España, aduna usab mga madre nga naggikan sa Agdao ug anaa karon sa mga nagkalain-laing kongregasyon sama sa Pious Disciples of the Divine Masters, Carmelite Sisters, Teresian Daughters of Mary ug uban pa.

Gibida usab ang 10 ka seminarista nga kasamtangan nga nagtuon karon sa St. Francis Xavier Seminary didto sa Pre-College, College ug Major Seminary.

Sa wala pa nahuman ang misa nga gipangulohan ni Abp. Romulo G. Valles kauban ang pipila ka mga pari nga taga-Agdao ug ubang pari sa religious congregations, gipasalamatan ni Fr. España ang mga pamilya nga maoy nag-umol sa pagtoo sa mga anak nila nga ihatag ang ilang kaugalingon sa pagserbisyo sa Ginoo diha sa bokasyon sa pagkapari ug pagka-relihiyoso.

Ang 50^th parochial fiesta sa San Antonio de Padua Parish namalandong sa tema: “Madagayaong pagpasalamat sa ika-50 ka tuig nga malangkubon ug mamugnaon nga pagkinabuhi isip sumusunod ni Kristo.” (@dcherald)