Nakaila ka ba kang Kristo?

12^th Sunday in Ordinary Time

Zec 12:10-11; 13:1/Ps 63:2. 3-4. 5-6. 8-9/ Gal 3:26-29/ Lk 9:18-24

Sa matag karon ug unya, daghang mga butang ug kasinatian nga atong mahiaguman samtang nagapuyo ug nagalakaw kita sa kalibutan. Apan adunay mga importante ug mas importante nga angayan natong puy-an nga makahatag nato ug katagbawan sa kinabuhi.

Ang mga pagbasa nato karong ika-12 nga Dominggo sa Ordinaryong Panahon, nagpadayag sa nindot nga plano sa Ginoo alang kanatong mga Kristiyanos.

Sa unang pagbasa ni Propeta Zecharias 12:10 ang Ginoo nagpadala sa Espiritu sa grasya ug pag-ampo. Ang Dios buot makigstorya sa tawo. Sa pag-istorya sa Dios, mahimo kitang mga tinuod nga mga anak sa Ginoo nga pareho o ‘equal’ ang dignidad.

Sa ika-duhang pagbasa-Galacia 3:26 ingon ni San Pablo—diha sa pagtoo nahimo kitang mga anak sa Dios ug diha sa bunya gang tanan klaseng tawo—Hudeo, pagano, lalaki o babae, nahimong usa diha kang Kristo. Sa ato pa: walay maglabaw sa iyang isig-katawo ug walay magbungkag sa katilingban sa Ginoo.

Sa Ebanghelyo ni San Lucas 9:18-24, nangutana si Hesus kung nakaila ba sila kaniya. Alang kang San Pedro ug sa mga sumusunod niya niadtong panahon—siya mao ang Mesiyas—ang manluluwas.

Si Hesukristo karon, mangutana usab kanato kung nakaila ba kita niya. Makaila lang kita kaniya kung dunay seryoso nga pagtubag sa pangutana kung kinsa gayud siya. Dili sa pagtubag basi sa mga tubag sa mga “suma nila” kon dili “sumala nimo” o sa personal na kasinatian. Dili usab diha sa mga panghuna-huna kon dili basi sa mga panagtagbo kini sa adlaw-adlaw nga kasinatian.

Ngano kinahanglan sa personal nga level ang pag-ila kaniya? Importante kini kay ang sunod nga pulong ni Hesus adunay pagsabot kung kinsa siya: Lucas 9:23- “Ang buot musunod kanako” ingon siya “pas-ana ang krus adlaw-adlaw”.

Ang mga kasakit, panamastamas, pagbiay-biay ug sa pagpatay kaniya, mao usab ang dalan, kinabuhi ug kamatuoran nga agi-an sa nakaila ug buot musunod kaniya.

Ang katagbawan sa kinabuhi mao ang pagdawat sa Espiritu nga naghiusa kanato diha ni Hesukristo sa matag-adlaw nga pagpuyo sa mga problema ug kasakit sa kinabuhi. Kinsa diay si Hesukristo?

Ni Fr. Jose Marie Escuadro