Lahutay Bisan Sa Mga Pagsalikway

Ikanapulo’g-tulo nga Domingo sa Ordinaryong Panahon
1 Hari 19:16b, 19-21/ Gal. 5:1, 13-18/ Lk. 9:51-62

Kung kita gisalikway dili ba kasagaran mangandoy ta nga ang nagpasakit nato mag-antus usab? Kung kita wala dawata dili ba kasagaran mangita usab kita’g pamaagi nga mubalos nga sobra pa sa naghimo kanato sa ingon?

Normal ug tawhanon kaayo kini nga pagbati sama sa mga tinun-an ni Kristo nga si Juan ug Santiago nga buot unta mopaulan og kalayo gikan sa langit aron masunog ang mga tawo nga wala modawat kang Kristo.

Apan ang espirituhanon nga kinabuhi diha kang Kristo, mao nga mopadayon kita sa atong panaw sa pagsangyaw sa kaayo sa Ginoo isip kabahin sa atong misyon, sama nga si Kristo mibadlong sa Iyang mga tinun-an ug nag-awhag kanila nga mopadayon sa ilang panaw sa laing balangay.

Ang pagsaksi kang Kristo mao nga biyaan nato ang atong kaugalingong seguridad alang sa Ebanghelyo. Kini ang pagkinabuhi sa pagpadaplin sa kaugalingong kaharuhay aron ang kaayo mapatunhay. Taliwala sa mga pagsalikway ug pagsaway, ang pagbarug alang sa maayong kabuboy-on nag-awhag kanato sa kalig-on bisan pa man sa mga kabudlay ug pagsulay.

Sama kang Eliseo nga misunod kang Elias diha sa unang pagbasa, kita gitawag sa pagkapropeta – ang pagkinabuhi isip saksi ni Kristo diha sa maayo natong buhat ug kinaiya. Kita gitawag sa pagpuyo diha sa Espiritu ug dili sa tinguha sa lawasnong kaibog sama sa nadungog nato sa ikaduhang pagbasa.

Isip Simbahan, usahay mabati nato nga kita gisalikway kay mas daghan pang moapil sa mga kalingawan kaysa sa Kasaulogan o Hiniusang Pag-ampo. Usahay kita daw gisalikway kay yam-iran lamang sa uban ang atong gitudlo sama sa Pro-life ug Pro-family. Apan kini pipila lamang sa mga kahigayonan aron kita makasaksi isip sumusunod ni Kristo.

Dili ba katingalahang buhat sa Dios nga ang mga unang Kristiyano nga gisalikway ug gani gipamatay, nakapalipang ug nakapa-aghat sa kadaghanan sa pagtoo kang Kristo? Dili kaha pud ang atong paglahutay atubangan sa mga pagsalikway ug pagsaway makapadasig sa kadaghanan niining Tuig sa Pagtoo?