(Cf. Kompendiyo sa Katekismo sa Simbahang Katoliko, 61-63)

            P: Sa unsa man nga paagi ang mga anghel anaa sa kinabuhi sa Simbahan?

T: Ang simbahan miduyog uban sa mga anghel sa pagsimba sa Dios, misangpit sa ilang panabang ug misaulog sa handomanan sa pipila, diha sa iyang liturhiya.

“Sa kiliran sa matag tumutuo nagbarog ang usa ka anghel isip tigpanalipod ug magbalantay nga nagtultol niya padulong sa kinabuhi.” (San Basilio Bantugan)

            P: Unsa man ang gitudlo sa Balaan nga Kasulatan mahitungod sa pagmugna sa nakita nga kalibotan?

T: Pinaagi sa asoy sa “unom ka adlaw” sa pagmugna sa kalibotan ang Balaan nga Kasulatan nagatudlo kanato sa bili sa minugnang kalibotan ug sa tumong niini, nga mao, ang pagdayeg sa Dios ug pag-alagad sa katawhan. Matag usa sa mga binuhat nakabaton sa iyang pagka-anaa gikan sa Dios, nga maoy nagahatag sa iyang kaayo ug kahingpitan, sa iyang mga tukmang balaod ug sa iyang tukmang luna diha sa uniberso.

            P: Unsa man ang luna sa tawo diha sa kamugnaan?

T:Ang tawo mao ang kinauyokan sa makita nga kamugnaan tungod kay gimugna siya diha sa larawan ug kasamahan sa Dios.