Cf. Kompendiyo sa Katekismo sa Simbahang Katoliko, 55-57

P: Unsa man ang diosnon nga Probidensya?

T: Ang diosnong Probidensiya nahilakip diha sa mga han-ay nga gipasunod sa Dios sa mga binuhat ngadto sa ilang kinauyokang tumong. Ang Dios mao ang gamhanan nga Ginoo sa iya mismo nga plano. Sa pagpatigayon hinuon niin, iya usab nga gigamit ang pagbulig sa iyang mga binuhat. Kay ang Dios nagahatag sa iyang mga binuhat sa katakos sa kaugalingon nga paglihok ug sa pagka-naingnan sa usag-usa.

P: Unsaon man pagbulig uban sa Probidensiya sa Dios?

T: Tinahud ang atong pagkagawasnon, ang Dios nagatawag kanato pagbulig uban kaniya ug nagahatag kanato sa abilidad sa paghimo niini pinaagi og mga lihok, mga pag-ampo, ug mga pag-antos, ug sa ingon paghatag kanatog tinguha “pagtuman sa iyang kabubut-on” (Filios 2:13).

P: Kon ang Dios makagagahum sa tanan ug maalimahon, nganong anaa pa may daotan?

T: Niining maong pangutana, bisan ug sakit ug katingalahan kayo, ang kinatibuk-an sa Kristohanong pagtoo lamang mao ang makatubag. Ang Dios wala gyoy – kalabotan ni hinungdan – sa kadaotan. Naglamdag siya sa misteryo diha sa daotan, diha sa iyang Anak, si Jesucristo nga namatay ug nabanhaw aron pagbuntog sa dako nga daotan nga moral; ang sala sa tawo, nga anaa sa gamut sa tanang mga daotan.