Ang Kaminyoon usa ka sagrado nga bokasyon! (Part 1 of 2)

Ang bulan sa HUNYO  giila sa pipila nga bulan sa pagpakasal ug pagmugna ug bag-ong pamilya. Usa  ka nindot nga katilingban dinhi sa kalibutan mao ang PAMILYA diin kini gilangkuban sa Amahan, Inahan ug mga Anak. Ang pamilya dinhi sa atong katilingbang ginaingon nga basic unit of the community. Ug dinhi nagasukad ang tanan nga nagalungtad sa kalibutan.

Ang kalig-on sa pamilya nagasukad sa kahiusahan sa DIOS dinha sa tulo ka persona ang Amahan, Anak ug Espiritu Santo (Cf. 2 Cor. 13:14, Mat. 28:19-20). Aron nga mamahimo ug matukod ang usa ka pamilya nga sagrado ug dinihogan sa Dios kinahanglan nahasubay kini sa iyang lagda ug balaod. Apan usahay subo paminawon nga pipila ka mga tawo nga gustong mosulod sa kaminyoon nga walay saktong pagpamalandong o pag-discern sa iyang kaugalingon kung andam na ba siya niini mosulod sa maong bokasyon ug responsibilidad.

Aron nga mahimo ug matukod  ang usa ka pamilya, kinahanglan nga moagi gayud kita ug kaminyoon , ug kung maghisgut kita ug kaminyoon dinhi gilangkob ang mga importanteng butang sama sa pagpili ug mahimo nga banhonon o asawahonon , pagpamalandong ug pagpangandam sa pagpakasal ug pagplastar sa kaugalingon aron nga mama-tutu ang mga bunga sa panag-ipon mao ang pagbaton ug mga kabataan o anak.

Unsa man diay ang kaminyoon? Kini usa ka sagrdadong bokasyon diin ang Dios mismo maoy nagtukod niini ang kaminyoon usa diay ka SAKRAMENTO. Ug sumala pa ni San Pablo “Kay ang bana mao ang ulo sa asawa, maingon usab nga si Cristo ulo sa iglesia nga mao ang iyang lawas, ug siya mao ang Manluluwas niini. Maingon nga ang iglesia masinugtanong nagpasakop kang Cristo, sa ingon usab niana ang mga asawa kinahanglan magpasakop nga masinugtanon sa ilang masigka-bana sa tanang paagi. Kamong mga bana, higugmaa ninyo ang inyong masigka-asawa, maingon usab nga si Cristo nahigugma sa iglesia ug mitugyan sa iyang kaugalingon alang kaniya, aron iyang balaanon siya sa mahinloan na niya siya pinaagi sa paghugas kaniyag tubig uban sa pulong, aron nga sa iyang atubangan ang iglesia ikatanyag diha sa katahum niini, nga walay buling o kunot o bisan unsang sulosama niini, aron magmabalaan siya ug dili masaway, Ingon usab niini, ang mga bana kinahanglan magahigugma sa ilang masigka-asawa ingon nga ilang kaugalingong lawas. Ang nagahigugma sa iyang asawa nagahigugma sa iyang kaugalingon, “Tungod niining maong hinungdan, pagabiyaan sa lalaki ang iyang amahan ug inahan ug makig-usa siya sa iyang asawa, ug silang duha mahimong usa.” (Efeso 5:23-32).

Ni: Bro. John Reyes ug Bro. Ronald Rondina