11th Sunday in Ordinary Time

ni Fr. Arnulfo Cubero
Parish Priest, St. John the Baptist Parish, Lasang
2Sm 12:7-10.13/Ps 32:1-2.5.7.11/
Gal 2:16.19021/Lk 7:36-8:3 or Lk 7:36-50
 

Niining ika-napulo’g usa nga Dominggo sa Ordinaryong Panahon ang mga pagbasa naghisgot mahitungod sa grasya sa kapasayloan.  Sa unang pagbasa (2Sam 12:7-10.13), gipakita ni Natan kang David kung unsa ka daku ang nahimu niyang sala nga mao ang pagpatay kang Urias didto sa gubat ug ang pag-ilog sa asawa niini nga si Batseba.  Apan gi-ingnan ni Natan si David nga gipasaylo siya sa Ginoo (v.13).

Sa ikaduhang basahon (Gal 2:16.19-21), si San Pablo misugilon sa mga tawo sa Galatia nga bisan sa iyang pagkamakasasala apan gihimo siya sa Dios nga matarong dili tungod sa iyang pagtuman sa Balaod, kun dili pinaagi sa iyang pagtuo sa anak sa Dios, si Jesu-Cristo.

Sa ebanghelyo (Lk 7:36-50), gipasaylo ni Jesus ang babaye nga daghang mga sala (v.47).

Pamalandong:

Ang gugma sa Dios sa tawo gipakita pinaagi sa pagpasaylo.  Ang Dios wala magtagad kung unsa ka daku sa sayop o sala nga nahimo sa tawo.  Apan ang gipangita sa Dios sa tawo mao lamang ang pag-amgo ug paghinulsol sa kasaypanan sama kang David sa unang gibasa nga miingon: “nakasala ako sa Ginoo” (v.13.).  Duna ba kitay kadasig sa pag-ila sa atong kasaypanan?

Bisan unsa ka daku sa sayop sa tawo apan kung maka-amgo tungod sa pagtuo kang Kristo, sinugdanan kini sa kausaban sa iyang kinabuhi ug musumpay sa mga buhat sa kaluwasan.  Ang kinabuhi ni San Pablo maoy buhing testigo niini.  Unsang matang nga pagsumpay nato sa mga buhat sa kaluwasan tungod sa atong pagtuo kang Jesu-Cristo?

Ang pagbuhat sa mga timaan sa gugma ug pagkamapasalamaton sa tawo, diwa sa usa ka pag-ila sa kaayo sa Ginoo. Matud pa, kadtong mga nakasinati sa gugma labi pang mahigugmaon.  Apan kadtong nakadawat og dyotay’ng gugma mahadlukon nga muhatag sa iyang kaugalingon.  Kita ba manggihatagon sa atong panahon ug mapasayloon?