10th Sunday of Ordinary Time

JUNE 9, 2013
LK 7:11-17

Ang matag lubong sa minatay, masulob-on gayud. Apan ang paglubong sa usa ka minatay nga nahinagbo ni Hesus didto sa Nain naputos sa tulo ka hinungdan sa tumang kasubo; Una, ang namatay usa ka batan-on; Ikaduha, bugtong anak siya; ug Ikatulo, ang iyang inahan usa ka biyuda. Maoy hinungdan si Hesus mismo gibati usab ug kalooy alang sa biyuda nga inahan.

Apan, nahibulong ang mga tawo sa pagkadungog nila kang Hesus nga misulti sa biyuda, “Ayaw paghilak”. Ngano kaha nga did-an man ni Hesus ang maong inahan sa paghilak? Dili ba nga natural man lang nga mohilak kung kita mamatyan?

Matubag kining pangutanaha ug masabtan ra gayud ang gipasabot niining mga pulonga diha sa mosunod nga gihimo ni Hesus diin gipabangon niya ang batan-ong namatay.

Si Hesus ang Anak sa Diyos nga nahimong tawo anaay gahum sa pagbuhi sa mga minatay. Gigamit gayud ni Hesus sa hingpit ang maong gahum sa pagbanhaw niya sa batan-ong namatay. Nan wala nay hinungdan nga mohilak pa ang biyudang inahan. Kon mohilak man galling siya, nan hilak lamang sa kalipay kay buhi diay ang iyang anak.

Unsa may mensahe alang kanato niining milagro nga gihimo ni Hesus sa Ebanghelyo karon? Diha sa ebanghelyo, si Hesukristo, ang gamhanang Dios sa kinabuhi ug sa kamatayon, nagtudlo kanato sa makausa pa sa angayan ug Kristohanong pagsabot sa kamatayon.

Alang sa walay kabang kaagan ug walay pagtoo, sama sa mga pagano,ang kinabuhi matapos gayud sa kamatayon ug wala nay laing kinabuhi luyo sa lubnganan. Busa, alang kanila ang kinabuhi, karon ug dinhi, uban sa mga kalipay ug mga kahilayan nga sumpay niini, mao ray labing importante.

Alang kanatong mga Kristiyanos, unsa man ang pagsabot sa kamatayon? Ang atong Kristohanong pagtoo nagtudlo kanato nga ang kamatayon ni Hesus naglingkawas kanato sa gituohan sa mga pagano nga walay katapusang kamatayon. Gani, tungod kay nabanhaw man si Hesus human mamatay, ang kasubo nga idalit sa kamatayon pulihan na karon sa masanag nga saad sa kinabuhing walay katapusan.

Tungod kay mao kini ang atong pagtoo, duna tingali uban nga makaingon nga dili na Kristohanon ang mohilak kon dunay mamatay. Dili ba ang atong kasubo pulihan man sa paglaum nga atong mga minahal nga nangamatay nakaangkon na sa himaya sa kinabuhing walay katapusan?

Wala man mag-ingon ang atong maloloy-ong Ginoo nga dili kita mohilak kung kita mamatyan. Apan, siya hinoon miingon nga dili kita mag-ula ug mga luha sa pagkawalay paglaum. Tingali lawom ug pait ang kasubo ug kamingaw nga atong bati-on tungod sa pagkamatay sa usa ka minahal kaayo sa kinabuhi. Apan, ang atong mga mata sa pagtoo anaa unta kanunay kang Hesukristo, ang Ginoo sa kinabuhi, uban sa iyang masanag nga saad sa kinabuhing walay katapusan luyo sa lubnganan.

Fr. Severino ‘Ben’ Capulong, Jr.
Parish Priest
St. Francis Xavier Parish, Tibungco, Davao City