Ang Kabililhon sa Santos Nga Yukaristiya (Part 2 of 2)

Ang pulong Yukaristiya nagkahulogan usab ug Pagpasalamat. Si Hesukristo gayud mismo ang nagtukod niini diha sa katapusang panihapon. Busa ang Simbahan kanunay nagatudlo nga ang YUKARISTIYA tinuod gayud nga lawas ug dugo ni Hesukristo.

Sa ebanghelyo (Juan 6:48-57) mabasa: “AKO ANG PAN NGA NAGHATAG SA KINABUHI, ang inyong mga katigulangan nagkaon sa mana didto sa kamingawan, apan nangamatay gihapon sila, ANG MOKAON SA PAN NGA GIKAN SA LANGIT DILI MAMATAY. AKO ANG PAN NGA GIKAN SA LANGIT NGA NAGHATAG SA KINABUHI. ANG MOKAON NIINING PAN DILI GAYUD MAMATAY. UG ANG PAN NGA AKONG IHATAG MAO ANG AKONG UNOD ARON MABUHI ANG KALIBUTAN. Ang akong UNOD mao ang tinuod nga KALAN-ON, u gang akong DUGO mao ang matuod nga ILIMNON”.

Apan sa Juan 6:60-66 daghan sa iyang mga tinun-an ang nakadungog niini ug miingon, lisod kaayong dawaton kining pagtulun-ana. Tungod niini daghan sa iyang mga tinun-an ang mibiya ug wala na gayud mokuyog kaniya.

Sa panahon ni Kristo diin siya mismo ang namulong daghan ang wala manoo kaniya gawas sa mga Apostoles. Ang Simbahan nga iya ni Kristo kanunay gayud nagatudlo ug nagatoo nga sa katapusang panihapon si Kristo mituman sa iyang panaad, samtang ngaon sila mikuha si Jesus sa PAN, nagpasalamat sa Dios ug gipikaspikas niya kini ug mihatag sa iyang mga tinun-an. Dawata ninyo kini ug kan-a miingon siya “KINI MAO ANG AKONG LAWAS”, ug mikuha siya sa KUPA ug mipasalamat sa Dios mihatag kanila ug miingon imna ninyo kini nga tanan siya miingon KINI MAO ANG AKONG DUGO nga naglig-on sa kasabotan, ang akong DUGO nga giula alang sa tanan aron sa pagpasaylo sa mga sala. (Mateo 26:26-28), BUHATA NINYO KINI ARON PAGHANDOM KANAKO (Lucas 22:19-20).

Si San Pablo miingon “busa ang mokaon sa Pan sa Ginoo ug moinom sa iyang kupa sa paagi nga dili takus, nakasala batok sa lawas ug sa dugo sa Ginoo (1 Cor. 11:27), mao nga ang Simbahan ni Kristo kanunay gayud nagapahimangno sa tanang magtotoo nga modawat kita niini hinlo ug takus gayud sa atong kinabuhi. Busa adunay dakong bili sa atong Kristohanong kinabuhi kining Santos nga Yukaristiya sanglit kini mao man ang pinakataas ug sentro sa tanang Sakramento.