Kasaysayan sa Sto. Niño Parish

8120 Poblacion Kaputian
Island Garden City Of Samal

Hampak sa balud ug klase klaseng unos sa kinabuhi ang naagian sa parokya sa Sto. Niño una pa man kini miabot sa iyang ika-34 nga kapistahan karong tuiga.

Nagsugod isip usa ka kapilya sa Immaculate Conception Parish, Peñaplata, ang unang ngalan niini mao ang Sta. Teresa Del Niño De Jesus. Apan sa wala madugay nailisan kini ug laing pangalan nga mao ang Sto. Niño sukad 1958 hangtod karong tuiga 2017. Ang nagbag-o niini gipangulohan nila Pedro Yap, Juan Diva, Juan Rojas, ug Mrs. Andrea Del Campo.

Nanghulam ug estatwa sa Batang Hesus sila si Mr. Rojas and Juan Diva sa Limao, Peñaplata. Dayon gitukod ang kapilya sa baybayon sa Poblacion, Kaputian sa panguna ni Mr. Isidro Martinez, ang master carpenter niadtong tungura. Ang mga materyales gama lamang sa kahoy ug dahon sa lubi. Gisaulog unang Misa ug pista niadtong Enero 15, 1958 ni Rev. Fr. Florain Rock, PME.

Tungod sa bagyo nga miigo sa baybayon sa Poblacion Kaputian, naapil ug kaigo ang kapilya sa Sto. Niño, apan wala magpapildi sa kalamidad ang katilingban nga pinangunahan sa ilang lider nga si Mrs. Andrea del Campo.

Aduna pay 3 ka kapilya ang natukod una kini naplastar ug nahimo nga parokya. Daku ang kalambigitan sa mga kabataan sa sinugdanan, tungod kay ang unang organisasyon nga namugna mao man ang Kaputian Christian Youth Organization. Opisyal nga nahibulag ang kapilya gikan sa Peñaplata niadtong Mayo 30,1983. Unang kura paroko nga na assigned mao si Rev. Fr. Rino Rengel Enopeña, DCD. Ang grupo lamang sa Adoracion Nuctorna ang anaa sa iyang pag abot. Siya gi instalar niadtong Mayo 31, 1982. Sa iyang upat ka tuig, 38 ka GKK na ang iyang gimatuto, hangtud sa miabot kini ug 42 ka tuig apil ang Nuestra de Salvacion sa Lisob ug San Vicente Ferrer sa Baong, Talicud.

Ang ikaduhang kura paroko mao si Rev. Fr. Alijandrino Calapis Abing, DCD gikan Siquijor. Sa iyang paglingkod, namugna ang parish convent ug ang Camotesan Chapel sa Talicud Island.

Kaniadtong Mayo 21, 1988, nahimo nga ikatulong kura paroko si Rev. Fr. Loreto Bastasa, DCD diin sa iyang termino nausab ang mga polisiya sa Simbahan, apil na ang pagmugna sa responsibilidad sa mga lideres sa Simbahan. Gipakusgan ni Fr. Bebs ang pormasyon hilabi na sa mga ministriya sa Pangulo sa Alagad, Pangulo sa Liturhiya, ug Pangulo sa Panudlo.

Misunod si Rev. Fr. Jovil Bongay, DCD isip ikaupat nga kura paroko. Siya mismo ang nangulo sa Youth Development Training. Kauban si Mayor Aniano P. Antalan, gipahigayon nila ang Parish Youth Convention. Prayoridad ni Fr. Bongay ang mga batan-on ug pormasyon sa lideres sa Parokya.

Napulihan si Fr. Bongay human ang iyang termino ni Fr. Campeon. Nahitabo sa iyang panahon ang pagsaulog ug misa sa mga eskwelahan. Ang mga grupo sa Poblacion nagpili sa ilang Patron dayon sila nagsaulog sa kapistahan matag grupo.

Gisundan si Fr. Campeon ni Fr. Nelson Lucas, DCD. Iyang gimugna ang nagkadaiyang inprastruktura sa parokya. Siya gipulihan ni Fr. Roy Mejias. Ilawom sa iyang termino, iyang napaayo ang altar ug mga bintana sa kombento. Mipuli si Fr. Ricky Flores human ni Fr. Mejias. Sa iyang administrasyon, naorganisa ang Knights of Columbus ug ang Charismatic Renewal nga grupo.

Misunod si Fr. Rico Enriquez, diin sa iyang administrasyon unang gipahigayon ang nagapadayong Fiesta Sinulog. Siya usab ang nagpasiugda sa panaw-duaw sa Sr. Sto. Niño sa matag distrito una muabot ang kapistahan. Nainstalar isip kinaunhang parish priests sa bag-ong parokya sa Sta. Cruz, Talicud, IGaCoS si Fr. Rico sa miaging tuig.

Sa pagsiak sa parokya sa Samal, aduna nalay 34 ka mga GKK ang Parokya nga kasamtangang ginadala ni Fr. Pepe Retorca. Padayon nga gipangusgan ni Fr. Pepe ang monthly masses sa GKK ug campuses alang sa mga estudyante. Sa Tuig sa Parokya, buot ni Fr. Pepe nga pahingusgan ang pagpartisipar sa mas daghan pang parokyano sa mga kalihukan sa Simbahan. (Silver Jubilee Fiesta Celebration Souvenir | Translated by ML Asoy | SNP SoCCom)